القهوجى والحكومة

النهاردة ان شاء الله هنرغى مع بعض شوية كالعادة وهحكيلكم حكاية قهوجى .طبعا دلوقتى هيقوم اللى يقولى مش فاضيين للرغى بتاعك وحل عن سمانا وارغى فى حتة تانية ورانا مشاكل واعتصامات ومظاهرات ومش فاضيين للكلام الفاضى اللى لا بيودى ولا بيجيب .

بس انا برده  هحكيلكم لان الحكاية دى ليها علاقة بالحكومة والاعتصامات والمظاهرات هتقولولى طبعا ازاى فيها شبه يعنى ايه اللى جاب القهوجى للحكومة والمظاهرات ؟ متستعجلوش يا خبر النهاردة بفلوس بعد سطرين هيبقى ببلاش .

 

نبتدى بقى الحكاية القهوة دى عبارة عن قهوة بلدى صغيرة وفيها قهوجى اسمه احمد بس مش اى قهوجى ده قهوجى من نوع خاص يعنى متلاقيش زيه فى اى مكان تانى ولاحتى فى اى اتيليه تحف .يعنى ييجى الزبون يقعد على اى كرسى فى القهوة ده لو لقى كرسى سليم اصلا طبعا العادى من اى قهوجى يروح يشوف الزبون يطلب ايه بس لان ده زى ما قلنا من نوع خاص فلازم الزبون صوته يتنبح الاول  علشان الباشا يرد عليه وبعد ما ربنا يكرمه ويرد على الزبون والزبون يطلب طلباته يروح ويغيب ساعة …ساعتين ..احتمال تلاته .. والزبون مش شايف اى مشاريب جاية ولو جاتله هتجيلة طلبات غير اللى هو طلبها اصلا .

ده لو كان الزبون لسه جديد على القهوة اما بقى لو زبزن قديم وماصل زى حالاتى هيكون اتهرى منه كتير وخد خبرة كفاية علشان كده بمشى معاه بمبدا اخدم نفسك بنفسك .

وزى ما القهوجى شخصية غريبة برضه الزباين اغرب منه يعنى فى زباين بتستغل الزهايمر او الطيبة الزيادة عن اللزوم اللى عند القهوجى تاخد طلبات ومتحاسبش عليها والقهوجى عايش فى غيبوبة اما الزباين اللى عندها شوية ضمير وبتحاسب كانه زنب عليها يبقى عايز يحاسبهم زيادة عن الطلبات اللى خدوها عايز يعوض الخسارة باى شكل .

يا ترى ايه وجه الشبه بين القهوجى والحكومة ؟

الحكومة الحالية عاملة زى القهوجى لازم الناس صوتها يعلى وتخرج فى مظاهرات واعتصامات واضرابات علشان تسمع طلباتهم وممكن تنفذها وممكن متنفذهاش ولو نفذتها يبقى هتنفذ جزء منها والباقى على ما تفرج يعنى الحكومة برده عايشة فى الغيبوبة علشان كده تلاقى بعض الناس اللى بتستغل حالة الغيبوبة دى وتسرق وتنهب من البلد والحكومة شايفة ان فى خسارة وعايزة تعوضها تعوضها منين من الناس الغلابة اللى عندهم ضمير .

ليه البلد متبقاش عاملة زى القهوجى الشاطر اللى فايق لشغله وعارف الزبون بتاعه بيحب يشرب ايه ويبقى عارف طلبه من قبل ما يطلبه والطلبات تيجى بسرعة علشان حال البلد يهدا ونبطل شغل الاعتصامات والاضرابات اللى مش بيفيد بحاجة بالعكس بيوقف عجلة الانتاج .

لازم الحكومة تنفذ طلبات الناس علشان تبطل اعتصامات ومظاهرات والعجلة تمشى وتبقى تمام وتنعش الاقتصاد بتاعنا اللى كل شوية فى النازل .

ولازم كل واحد يحاسب على قدر عمله ومش علشان فى ناس تانية بتهرب من القانون نحاسب الناس اللى مبتقدرش تهرب زيادة عن  جزاء ما ارتكبه مش علشان يعنى متجيش تحكملى على واحد فى سرقة بالاكراه بالمؤيد واللى نهبو البلد كلها وقتلو ولادها مش عارفين نحكم عليهم لغايت دلوقتى يارب تكون وصلت المعلومة وعرفنا العلاقة بين القهوجى والحكومة اللى هما الاتنين فى غيبوبة ………

بقلم : عاصم عرابى

6-10-2011

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s